Om deel van ‘n liefdevolle gesin te wees, is een van die grootste seëninge in die lewe; maar dit kan ook harde werk wees om deel van so ’n liefdevolle gesin te wees. Daar kom ook konflik. Daar kom ook stres. En soms verbrokkel selfs ‘perfekte’ gesinne.

Wat die meeste van ons wil hê, is vrede in die huis. Daar is meer as genoeg druk, meer as genoeg konflik om jou lewenslank mee besig te hou wanneer jy daar buite in die wêreld is en besig is met dit, wat jy van dag tot dag doen.

Maar wanneer jy by jou voordeur instap, is vrede al wat jy wil hê. Jy wil welkom voel in jou eie huis. Jy wil jouself kan wees; jy wil ontspan; jy wil rus. Ons wil dit almal hê, maar ons kry dit nie altyd nie.

So, kom ons gaan vandag terug na die basiese beginsels. Kom ons doen ‘n blitskursus in “gesinsvrede 101- ‘n inleidende kursus.” Ja, my vriend, wanneer dit kom by gesin-wees, vorm die basiese beginsels onvermydelik die kern pilare waarop alles anders gebou is.

Genesis 2:24 Daarom sal ‘n man sy vader en moeder verlaat en saam met sy vrou lewe, en hulle sal een word.

Deesdae beskou baie mense die idee van die huwelik as outyds. Baie sien dit as ‘n irrelevante instelling. Maar die huwelik was altyd, van die begin af, God se plan – nie vir almal nie, maar vir die meeste van ons.

En die diepte van die band tussen man en vrou, die aandag wat hulle aan mekaar gee, die respek wat hulle vir mekaar betoon, vorm die grondslag van ‘n vreedsame huis.

Manne en vroue, moet mekaar nie verwaarloos nie. God het julle twee gemaak om één te wees. Dit was altyd sy plan.

Want dit is Sy Woord. Vars … vir jou … vandag.